«Առաջիկա մի քանի օրերն ու շաբաթները կարող են վճռորոշ լինել». Ալեքսանդր Ստուբ

ԱՄՆ-ի նախագահ Դոնալդ Թրամփը հայտարարել է, որ «տարածքների փոխանակումը» համարում է Ռուսաստանի և Ուկրաինայի միջև խաղաղության համաձայնագրի անհրաժեշտ մասը, բայց չի կարող վերջնական որոշումներ կայացնել այս հարցի վերաբերյալ։
Axios-ի փոխանցմամբ՝ Սպիտակ տան ղեկավարը այս կարծիքը հայտնել է Ուկրաինայի նախագահ Վլադիմիր Զելենսկու և եվրոպական երկրների ղեկավարների հետ զրույցի ժամանակ։

Պորտալի փոխանցմամբ՝ նա նաև նշել է, որ Ռուսաստանի առաջնորդ Վլադիմիր Պուտինի հետ Ալյասկայում հանդիպման ժամանակ իր նպատակներն են հրադադարի հասնելը և հասկանալը, թե արդյոք հնարավոր է լիարժեք խաղաղության համաձայնագիր։

Ֆինլանդիայի նախագահ Ալեքսանդր Ստուբը Ուկրաինայի վերաբերյալ առցանց հանդիպումից հետո ասել է, որ առաջիկա օրերն ու շաբաթները կարող են վճռորոշ լինել։

«Մենք միասին աշխատում ենք հրադադարի և երկարատև ու արդար խաղաղության հասնելու ուղղությամբ։ Մենք աջակցում ենք Ուկրաինային։ Հաջորդ մի քանի օրերն ու շաբաթները կարող են վճռորոշ լինել», - գրել է նա X սոցիալական ցանցում։