«Պակիստանը չի փոխի իր քաղաքականությունը ՀՀ-ի նկատմամբ՝ առանց Ադրբեջանի հետ խորհրդակցվելու»․ դեսպան

Վաշինգթոնում Ադրբեջանի և Հայաստանի միջև ձեռք բերված համաձայնագիրը երկկողմ հարաբերությունների զարգացման տեսանկյունից շատ դրական իրադարձություն է։ Այս մասին կարծիք է հայտնել Ադրբեջանում Պակիստանի դեսպան Քասիմ Մոհիուդդինը։

«Պակիստանի վարչապետ Շահբազ Շարիֆը զանգահարել է Ադրբեջանի նախագահին և շնորհավորել այս ձեռքբերման կապակցությամբ»,- նշել է նա։

Դեսպանը նաև նշել է, որ Պակիստանը մտադիր չէ փոխել իր քաղաքականությունը Հայաստանի նկատմամբ՝ առանց Ադրբեջանի հետ նախնական խորհրդակցությունների։

Դիվանագետը հիշեցրել է, որ Պակիստանը դեռևս չի ճանաչել Հայաստանը որպես անկախ պետություն՝ «ադրբեջանական տարածքների անօրինական օկուպացիայի պատճառով»։

«Սա եղբայրական Ադրբեջանի հանդեպ սիրո, հարգանքի և համերաշխության դրսևորում է։ Մենք այս քաղաքականությանը հավատարիմ ենք արդեն երեք տասնամյակ, փոփոխությունները հնարավոր են միայն Ադրբեջանում մեր ընկերների հետ խորհրդակցություններից հետո», - ասել է դիվանագետը։