«Եվրոպան պետք է ընդգրկված լինի Ուկրաինայում խաղաղապահ առաքելություններին»․ Մակրոն

Ֆրանսիայի նախագահ Էմանուել Մակրոնը NBC News-ին տված հարցազրույցում նշել է, որ Վաշինգթոնում տեղի ունեցած բանակցությունների ժամանակ եվրոպացի առաջնորդները Դոնալդ Թրամփին զգուշացրել են Ուկրաինայում խաղաղության գործընթացը հետաձգելու անթույլատրելիության մասին: Նրա խոսքով՝ լուրջ կասկածներ կան, որ Մոսկվան պատրաստ է խաղաղության։

Ֆրանսիայի նախագահը շեշտել է, որ ապագայում եվրոպական զինված ուժերը պետք է մասնակցեն Ուկրաինայում խաղաղապահ առաքելություններին:

«Մեզ անհրաժեշտ կլինի ուժեղ ուկրաինական բանակ, անհրաժեշտ կլինի տեղում դաշնակիցների աջակցությունը: Խաղաղապահ գործողությունները պետք է ապահովեն եվրոպացի գործընկերները»,- ասել է Մակրոնը։

Նրա խոսքով՝ անվտանգության երաշխիքներ չունեցող ցանկացած համաձայնագիր դատապարտված է ձախողման: «Վրաստան - 2008, Ղրիմ - 2014: Բացարձակապես պարզ է. եթե խաղաղություն կնքեք առանց երաշխիքների, Ռուսաստանը երբեք չի հարգի իր խոսքերը և չի կատարի սեփական պարտավորությունները: Հետևաբար, Ուկրաինայի անվտանգության երաշխիքները չափազանց կարևոր են»,- ամփոփել է Ֆրանսիայի նախագահը։