Երեքշաբթի, 13 հունվարի, 2026 թ.
|
Ստեփանակերտում`   +3 °C

«Պաղեստինի պետություն ստեղծելու Մակրոնի կոչը յուղ է լցնում հակասեմական կրակի վրա»․ Նեթանյահու

«Պաղեստինի պետություն ստեղծելու Մակրոնի կոչը յուղ է լցնում հակասեմական կրակի վրա»․ Նեթանյահու
516
Չորեքշաբթի, 20 օգոստոսի, 2025 թ., 12:54

Իսրայելի վարչապետ Բենիամին Նեթանյահուն Ֆրանսիայի նախագահ Էմանուել Մակրոնին մեղադրել է հակասեմականություն հրահրելու մեջ՝ Պաղեստինի Պետությունը ճանաչելու իր որոշման պատճառով։

Այս մասին հայտնում է POLITICO-ն՝ վկայակոչելով Մակրոնին ուղղված Նեթանյահուի նամակը:

Նամակում Նեթանյահուն խոսում է վերջին ամիսներին Ֆրանսիայում տեղի ունեցած հակասեմական միջադեպերի մասին և փորձում է դրանք կապել Մակրոնի՝ Պաղեստինի հանդեպ վարած քաղաքականության հետ։

«Պաղեստինի Պետություն ստեղծելու ձեր կոչը յուղ է լցնում այս հակասեմական կրակի վրա.... Այն խրախուսում է ՀԱՄԱՍ-ի ահաբեկչությունը, ուժեղացնում է պատանդներին ազատ արձակելու նրա դժկամությունը, խրախուսում է Ֆրանսիայի հրեաներին սպառնացողներին և քաջալերում հրեաների նկատմամբ ատելությունը, որն այժմ տիրում է ձեր փողոցներում», - ասել է Նեթանյահուն։
Ի պատասխան՝ Մակրոնի գրասենյակը, մատնանշելով Ֆրանսիայում հակասեմականությունը վերացնելու ուղղությամբ Մակրոնի ջանքերը, հակադարձել է քննադատություններին՝ նշելով, որ Նեթանյահուի պնդումը, թե Պաղեստինի Պետությունը ճանաչելու որոշումը հանգեցրել է Ֆրանսիայում հակասեմական բռնության աճի, «սխալ է, նողկալի և անպատասխան չի մնա»։

Հուլիսի 24-ին Մակրոնը հայտարարել էր, որ Ֆրանսիան պաշտոնապես կճանաչի Պաղեստինի Պետությունը սեպտեմբերին կայանալիք ՄԱԿ-ի նիստում, ինչը քննադատության էր արժանացել Իսրայելի կողմից։

Ֆրանսիայի հայտարարությանը հետևել էին Մեծ Բրիտանիան, Կանադան և Ավստրալիան։