«Պատժամիջոցները վերականգնելու քայլերն անհիմն են»․ Իրանի ԱԳՆ

424

Կիրակի, 28 սեպտեմբերի, 2025 թ., 13:08

Այսօր Իրանի արտաքին գործերի նախարարությունը հայտարարություն է տարածել, որում նշվում է, որ ՄԱԿ-ի կողմից պատժամիջոցների վերականգնումը «իրավաբանորեն անհիմն են և բարոյապես ու տրամաբանորեն անընդունելի»։

Նախարարությունը շեշտել է, որ երեք եվրոպական երկրները՝ Մեծ Բրիտանիան, Գերմանիան, Ֆրանսիան, և Միացյալ Նահանգները խախտել են Համատեղ համապարփակ գործողությունների ծրագիրը (JCPOA): Անվտանգության խորհուրդը չի կարող գործել եվրոպական եռյակի կողմից պատժամիջոցները վերականգնելու հայտարարության հիման վրա, և այդ պնդումները անընդունելի են։

Հայտարարության մեջ նաև նշվում է, որ Իրանը վերջին 20 տարիների ընթացքում բազմիցս ցույց է տվել իր հանձնառությունը երկխոսությանը և դիվանագիտությանը: Թեհրանը նաև հայտարարել է, որ կօգտագործի բոլոր հնարավոր միջոցները՝ պատասխանատվության ենթարկելու, պատժելու և փոխհատուցում պահանջելու նրանցից, ովքեր քայլեր են ձեռնարկում Իրանի դեմ։

Արտգործնախարարությունը հավելել է, որ Իրանի ժողովրդի իրավունքներն ու շահերը խախտող ցանկացած գործողություն կստանա «համարժեք և վճռական» պատասխան: