«ԱՄՆ-ն Ուկրաինային հետախուզական տվյալներ ու հրթիռներ կտրամադրի»․ #WSJ

Դոնալդ Թրամփի վարչակազմը պատրաստ է առաջին անգամ Ուկրաինայի հետ հետախուզական տվյալներով կիսվել՝ Ռուսաստանում էներգետիկ օբյեկտների դեմ հրթիռային հարվածներ հասցնելու համար, հաղորդում է The Wall Street Journal-ը: Թերթի աղբյուրների համաձայն՝ քննարկվում է նաև հեռահար հրթիռների, այդ թվում՝ Tomahawk-ի և Barracuda-ի մատակարարման հնարավորությունը: Փորձագետների կարծիքով՝ ԱՄՆ վարչակազմի նոր որոշումները արտացոլում են Սպիտակ տան քաղաքականության փոփոխությունը, որը նախկինում սահմանափակում էր Կիևի կողմից մատակարարված համակարգերի օգտագործումը Ռուսաստանի խորքը հարվածելու համար։

WSJ-ի աղբյուրները պնդում են, որ նախագահ Թրամփը հաստատել է ԱՄՆ գործակալությունների և Կիևի միջև հետախուզական տվյալների ընդլայնված փոխանակումը: Սա ներառում է օգնություն թիրախների, հիմնականում՝ նավթավերամշակման գործարանների, խողովակաշարերի և էներգետիկ ցանցերի ընտրության հարցում:

Մի աղբյուր նշել է, որ Սպիտակ տունը դեռևս պետք է գրավոր հրահանգներ տրամադրի գործողությունները սկսելու համար, բայց սկզբունքային որոշումն արդեն կայացվել է։