«Քանի դեռ անտեսվում են խնդիրները, մեր ազգային հավաքականից չպետք է հրաշք սպասել»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Հայաստանի ազգային հավաքականը պարտություն կրեց:
Տիգրան Բարսեղյանը, որին վստահվել է ավագի թևկապը, ջարդեց խաղը:
Հայ հանրությունը սևեռվել է այս երկու ցավալի փաստի վրա: Այսպես, որոշ ժամանակ կքննարկենք պարտությունն ու Տիգրանի իրավամբ ոչ սպորտային պահվածքը... և կսպասենք նոր հաղթանակի ու հրաշքի:
Բայց, բարեկամներ, հաղթանակ մեկ ու մեջ կարող է լինել, իսկ հրաշք չի լինելու:
Մեզ միայն հետաքրքրում է ազգային թիմը: Բայց եթե ուզում ենք ազգային թիմի հաջողությունը, վստահաբար ուզում ենք, պետք է հասկանանք, թե.
ա/ ինչու է Իտալիայից պարտվել մեր երիտասարդական հավաքականը և ինչու է անվերջ պարտվում գրեթե բոլոր խաղերում և ինչու է վերջին հորիզոնականում,
բ/ ինչու է Կոսովոյից պարտվել մեր ավելի փոքր տարիքի հավաքականը և ինչու է անվերջ պարտվում գրեթե բոլոր խաղերում,
գ/ ինչու մենք չունենք և հույս էլ չկա, որ կունենանք ՈՒԵՖԱ-ի չափանիշներին համապատասխան ազգային մարզադաշտ,
դ/ ինչու պետությունը չի ֆինանսավորում մանկապատանեկան և ակումբային ֆուտբոլը,
ե/ ինչու մենք չունենք մարզադաշտեր Հայաստանի բոլոր քաղաքներում և խոշոր բնակավայրերում...
Շարքը կարելի է շարունակել:
Ու քանի դեռ այս շարքի կետերը անտեսվում են, մեր ազգային հավաքականից չպետք է հրաշք սպասել:
Անշուշտ, Եղիշե Մելիքյանի գալով, և դա ճիշտ նշանակում էր, հավաքականը ձեռագիր ունի: Վստահ եմ, որ նրան պետք է մի քանի տարի ժամանակ տալ: Բայց, միևնույնն է, մենք լուրջ հաջողություններ չենք ունենալու, քանի դեռ չենք ուզում առերեսվել հնարավոր հաջողությունների ճանապարհին առկա խնդիրների հետ և լուծումներ չենք առաջարկում»: