Թրամփը Վաշինգթոնում Հաղթական կամար կկառուցի

ԱՄՆ նախագահ Դոնալդ Թրամփը ցանկանում է Վաշինգթոնում կառուցել Հաղթական կամար, հաղորդում են ամերիկյան լրատվամիջոցները։ Այն կտեղակայվի Լինքոլնի հուշահամալիրի կողքին։
Կամարը նախատեսվում է կառուցել 2026 թվականին՝ Միացյալ Նահանգների անկախության հռչակման 250-ամյակին։ Թեև կամարի կառուցման մասին պաշտոնապես չի հայտարարվել, Թրամփը դրա էսքիզը հրապարակել է Truth Social սոցիալական ցանցում։ Դատելով պատկերից՝ կամարը նման կլինի 19-րդ դարում կառուցված այս տեսակի դասական կառույցներին, այդ թվում՝ Փարիզի Հաղթական կամարին։ Ինչպես հաղորդում է CNN-ը՝ հղում անելով Սպիտակ տան աղբյուրներին, կամարի կառուցումը նախագահի սեփական գաղափարն էր. «Նա է մտածել նախագծի մասին և մասնակցել է նախագծի յուրաքանչյուր փուլին»։