«ԵՄ-ն կմասնակցի՞ «Թրամփի ուղի» նախագծին»․ հարց՝ Վասիլիս Մարագոսին

Հայաստանում ԵՄ դեսպան Վասիլիս Մարագոսը պատասխանելով հարցին՝ ԵՄ-ն կմասնակցի՞ «Թրամփի ուղի» նախագծին, հայտարարել է, որ ԵՄ-ն պատրաստ է մասնակցել տարածաշրջանում իրականացվող բոլոր ենթակառուցվածքային նախագծերին, և որ ԵՄ-ն կապի մեջ է ինչպես Հայաստանի կառավարության, այնպես էլ այլ գործընկերների հետ։
«Անցյալ շաբաթ ես Բրյուսելում էի՝ «Global Gateway» ֆորումին, որին ներկա էին մի շարք առաջնորդներ ամբողջ աշխարհից, ներառյալ Հայաստանի վարչապետ Նիկոլ Փաշինյանը։ Մենք քննարկեցինք, թե ինչպես է Եվրոպայի, Կենտրոնական Ասիայի և Չինաստանի միջև կապը զարգանալու հաջորդ փուլում, որը կներառի ամբողջ տարածաշրջանը, այդ թվում՝ Հայաստանը»,-ասել է Մարագոսը։
Դեսպանը նաև նշել է որ օգոստոսի 8-ին Վաշինգթոնում տեղի ունեցած միջոցառումն ու հանդիպումները ողջունվել են ԵՄ-ի կողմից, և ԵՄ-ն բոլոր հանդիպումներում և բոլոր հանրային միջոցառումների ժամանակ հայտնել է իր պատրաստակամությունը՝ աջակցելու տարածաշրջանում նախաձեռնություններին։
Ավելացնենք, որ Հայաստանում Եվրոպական միության պատվիրակության ղեկավար, դեսպան Վասիլիս Մարագոսի գլխավորությամբ եվրոպացի դիվանագետների և զարգացման գործակալությունների ղեկավարների ներկայացուցչական պատվիրակությունն այսօր այցելել է Սյունիքի մարզ։