«Արթուր Թավաքալյանին կանգնեցրել էին ընտրության առաջ»․ Արսեն Նիկողոսյան

Ակտիվիստ Արսեն Նիկողոսյանի ֆեյսբուքյան գրառումը․ «ԲԱՑ ՆԱՄԱԿ՝ ՀՖՖ ղեկավարությանը՝ քաղաքական հայացքների պատճառով իրականացվող հալածանքների վերաբերյալ։
Անարդարության, համակարգային ճնշման և արժանապատվության մասին։
Ես երկար ժամանակ լռել եմ, բայց լռությունը չի կարող հավերժ լինել։
Այն, ինչ տեղի ունեցավ իմ ընկեր Արթուր Թավաքալյանի հետ, պարզապես անհատական անարդարություն չէր․ դա խորքային, համակարգային խնդիր է, որը վաղուց պղտորել է մրցավարական ոլորտը և վերածել այն անձնական շահերի, ենթարկվելու ու վախի միջավայրի։
Երբ Արթուրը արտահայտեց իր անձնական դիրքորոշումն ու քաղաքական հայացքները, սկսվեցին ճնշումներ։ Մրցավարական համակարգի ներսում նրան սկսեցին վերաբերվել ոչ թե որպես մասնագետի, այլ որպես «անհարմար անձի»։
Արմեն Նիկողոսյանը իրեն թույլ է տվել բացահայտ պահանջել, որ Արթուրը դիմում գրի և հրապարակավ հայտարարի, թե իբր համաձայն չէ իր ընկեր Արսեն Նիկողոսյանի (այսինքն՝ իմ) գրառումներին, և խոստանա այլևս ոչ մի հակիշխանական ակցիայի չմասնակցել ու քաղաքական թեմայով ոչինչ չգրել։
Սա մարդու արժանապատվության, խոսքի ազատության և մասնագիտական անկախության բացահայտ ոտնահարում է։
Արթուրին կանգնեցրել էին ընտրության առաջ՝ կամ լռել և ենթարկվել անարդարությանը, կամ կորցնել ամեն ինչ։
Բայց Արթուրը չընտրեց լռությունը։
Նա չընտրեց համակերպվել այն համակարգի հետ, որտեղ արդարությունն ու ազատ խոսքը տեղ չունեն։
Նա ընտրեց մնալ արժանապատիվ և ազատ մարդ։
Այս պատմությունը մեկ մարդու մասին չէ։
Սա հայաստանյան իրականության արտացոլումն է, որտեղ իշխանական մտածողությունը թափանցել է նույնիսկ սպորտ, իսկ պաշտոնյաները, ովքեր պետք է լինեն արդարության երաշխավոր, դարձել են ճնշման գործիքներ։
Մենք չենք լռելու։
Մենք չենք վախենալու։
Ազատ մարդուն կարելի է զրկել պաշտոնից, բայց երբեք՝ արժանապատվությունից։
Խոսքը միայն Արթուր Թավաքալյանի մասին չէ։ Խոսքը այն բոլոր մարդկանց մասին է, ովքեր իրենց անկախ մտածողության համար ենթարկվել են անօրինական վերաբերմունքի։
Մենք շարունակելու ենք բարձրաձայնել, մինչև համակարգը մաքրվի անպատասխանատվությունից, անձնական հաշվեհարդարներից և քաղաքական վախից»։