Մեծ Բրիտանիան պայմանագիր է կնքել Թուրքիային 20 Eurofighter Typhoon կործանիչ վաճառելու վերաբերյալ

Մեծ Բրիտանիան պայմանագիր է կնքել Թուրքիային 20 Eurofighter Typhoon կործանիչ ինքնաթիռ վաճառելու վերաբերյալ, հաղորդում է Bloomberg-ը։

Այս ինքնաթիռների արժեքը 8 միլիարդ ֆունթ սթերլինգ է։

Կործանիչ ինքնաթիռների գործարքը նոր փուլ է մտցնում Անկարայի և Լոնդոնի միջև հարաբերություններում, հայտարարել է Թուրքիայի նախագահ Ռեջեփ Թայիփ Էրդողանը։

«Ես այս քայլը համարում եմ նոր փուլ մեր ռազմավարական հարաբերություններում՝ որպես երկու մտերիմ դաշնակիցներ։ Ես հավատում եմ, որ Մեծ Բրիտանիայի հետ այս համագործակցությունը կբացի դռներ պաշտպանական արդյունաբերության ոլորտում համատեղ նախագծերի համար», - ասել է Թուրքիայի նախագահը Մեծ Բրիտանիայի վարչապետ Քեյր Սթարմերի հետ համատեղ մամուլի ասուլիսում։ Էրդողանը նաև նշել է, որ առևտրային և պաշտպանական հարաբերությունները Սթարմերի հետ իր սերտ երկխոսության կենտրոնում են։

«Մենք պատրաստ ենք մեր առևտրի ծավալը հասցնել 30 միլիարդ դոլարի, ապա՝ 40 միլիարդ դոլարի։ Մենք նաև հատուկ շեշտադրում ենք կատարում փոխադարձ ներդրումների և էներգետիկայի ու պաշտպանության ոլորտներում համագործակցության ընդլայնման վրա։ Ես հավատում եմ, որ մենք մեր ռազմավարական գործընկերությունը կբարձրացնենք նոր մակարդակի», - նշել է Թուրքիայի առաջնորդը։