Mirror-ը հրապարակել է կենդանի խխունջ ուտելու հետևանքով կոմայի մեջ ընկած, այնուհետև կաթվածահար եղած ու մահացած երիտասարդի պատմությունը

1602

Հինգշաբթի, 06 նոյեմբերի, 2025 թ., 22:24

Mirror պարբերականը հոդված է հրապարակել ռեգբիիստ Սեմ Բալարդի մասին, ով 2010 թվականին 19 տարեկան հասակում Ավստրալիայում երեկույթի ժամանակ կուլ է տվել կենդանի խխունջ, ինչը դարձել է նրա համար ճակատագրական։

Բալարդը և նրա ընկերները նկատել են խխունջը և մտածել, թե արդյոք իրենցից որևէ մեկը կարո՞ղ է այն ուտել։ Սեմը ռիսկի է դիմել և երեկույթից հետո բողոքել ոտքի ցավից։ Սեմը ենթադրել է, որ դա խխունջի հետևանքով է եղել, բայց նրա մայրն անուշադրության է մատնել։

Սեմը հետագայում ընկել է կոմայի մեջ, որտեղ մնացել է 420 օր։ Բժիշկները կարողացել են արթնացնել նրան, բայց նրա ամբողջ մարմինը կաթվածահար վիճակում է եղել։ Նա նաև խնդիրներ է ունեցել ջերմակարգավորման հարցում: Տարիներ ի վեր տևած պայքարից ու տառապանքից հետո 2018 թվականին նրա սիրտը կանգ է առել։

Պարզվել է, որ խխունջը վարակված է եղել թոքային որդով։ Պարազիտը արտազատում է թրթուրներ, որոնք կենդանիներից փոխանցվում են փափկամարմիններին։

Բալարդի ընտանիքը չի մեղադրում նրա ընկերներին այդ մարտահրավերի համար։ Մահացածի հարազատները կարծում են, որ նրանք պարզապես զվարճանում էին և չէին կասկածում, որ խխունջը կարող է սպառնալիք ներկայացնել։