«Պատմական հնարավորություն ունենք՝ օգնելու ազատ արձակել Բաքվում պահվող հայ գերիներին»․ Օկամպո

Առաջիկա երեք ամիսների ընթացքում մենք պատմական հնարավորություն ունենք օգնելու ազատ արձակել Բաքվում պահվող հայ գերիներին և ապահովել Լեռնային Ղարաբաղի ժողովրդի իրավունքների միջազգային ճանաչումը։ Այս մասին հայտարարել է Միջազգային քրեական դատարանի (ՄՔԴ) նախկին գլխավոր դատախազ Լուիս Մորենո Օկամպոն՝ կոչ անելով աշխարհի հայությանը միավորվել և սկսել նոր արշավ՝ խաղաղության, ճշմարտության և արդարության համար։

Օկամպոն մասնավորապես նշել է, որ ԱՄՆ նախագահ Դոնալդ Թրամփի թեկնածությունը կարող է դիտարկվել 2026 թվականի Նոբելյան խաղաղության մրցանակի համար, և հայերը կարող են աջակցել նրա թեկնածությանը։ Նոբելյան կոմիտեն չի կարող քննարկել Թրամփի թեկնածությունը, քանի դեռ Ադրբեջանը նախ ազատ չի արձակել հայ գերիներին և չի ճանաչել Լեռնային Ղարաբաղի ժողովրդի իրավունքները։

«Նոբելյան Խաղաղության մրցանակի առաջադրումների ժամկետն ավարտվում է 2026 թվականի հունվարի 31-ին։ Հիմա մենք պետք է գործենք և մոբիլիզացնենք աշխարհի բոլոր հայերին։ Եկեք սկսենք նոր գլոբալ արշավ՝ խաղաղության, ճշմարտության և արդարության համար»,- նշել է Օկամպոն։