«Ոչ մեկին չհուզեց, թե ինչ է կատարվել մայր լուսանի հետ». Վահան Թումասյան

«Շիրակ կենտրոն» ՀԿ նախագահ Վահան Թումասյանը երեկ ֆեյսբուքյան իր էջում գրել է. «Իհարկե, կարևոր է, թե, այնուամենայնիվ, ինչ է պատահել մայր լուսանի հետ, բայց ոչ մեկին չհուզեց․․․
Բագրավանում հայտնաբերված լուսանի ձագն անցած օրը իմ տարածած տեսանյութերի շնորհիվ դարձավ, ամբողջ երկու օր, համացանցի հիմնական քննարկվող թեման։ Հայտնաբերելուն պես տեղյակ պահեցինք պատկան մարմիներին, որ գան տանեն և բուժեն։ Ակնհատ էր, որ հյուծված և ծանր վիճակում էր կենդանին։ Մի խոսքով, եկան տարան։ Ամբողջ գիշեր իմ լավ բարեկամ մասնագետներից կենդանու մասին տեղեկություններ էի ստանում։ Չէի պատասխանում համացանցում, տեսանյութերի տակ և իմ էջին գրված հարյուրավոր հիմարություններին և զառանցանքներին։ Մենք, հատկապես բագրավանցիները, շատ էինք ուզում, որ կենդանին ապրեր․․․
Բայց այսօր առավոտյան իմ լավ բարեկամները հայտնեցին, որ հնարավոր չի եղել փրկել առանց մոր մնացած ձագի կյանքը։
Մի քիչ առաջ էլ հաղորդագրություն տարածվեց այդ մասին, ուր մասնավորապես ասված է․․․
Կենդանաբանական այգին անմիջապես ապահովել է հանգիստ միջավայր, տաքություն, ջուր և կեր, սակայն խիստ բժշկական միջամտությունը վտանգավոր էր. դա կարող էր հանգեցնել արագ մահվան։ Ցավոք, կենդանին տեղափոխվելուց մոտ մեկ ժամ անց անկել է։ Դիահերձումը ցույց է տվել, որ մահվան պատճառը եղել է երիկամների սուր անբավարարությունը, ինչպես նաև արձանագրվել են սրտային անբավարարության նշաններ՝ հյուծման և ուժեղ սթրեսի հետևանքով։
Իհարկե կարևոր է, թե, այնուամենայնիվ, ինչ է պատահել մայր լուսանի հետ, ես համոզված եմ, որ օրեր շարունակ մենակ կենդանին թափառել է, նույնիսկ ուժ չի ունեցել իրեն պաշտպանելու և թաքնվելու․․․
Բայց այս ամբողջի մեջ ոչ պակաս ցավալի է հիմարների, այսպես կոչված կենդանասերների, իրենց կյանքում մի նորմալ բան չարած, բայց մարդկանց հասցեին զրպարտչական, հիմար որակումներ տվողների պահվածքը։ Չգիտեմ, հիմա մտածում եմ, որ գուցե առհասարակ իմաստ չուներ տեսանյութերը տարածել, ամբողջը հանրայնացնել։ Ի վերջո ոչ պակաս ցավալի երևույթներ լինում են, որոնց մասին չի բարձրաձայնվում, ոչ մեկի պետքն էլ չի լինում, ոչ ոք չի հետաքրքրվում, որովհետև այդ վիրավորանքներ շարողները կոմպի դիմացից հեռու գնացողները չեն»: