«Ուկրաինան և ԱՄՆ-ն պատրաստել են փաստաթղթերի նախագծեր»․ Զելենսկի

Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովը և Գլխավոր շտաբի պետ Անդրեյ Հնատովը ներկայացրել են ԱՄՆ-ում կայացած հանդիպումների արդյունքները։ Ինչպես հաղորդում է РБК-Украина-ն, Զելենսկին այս մասին գրել է Telegram-ի իր էջում։ Զելենսկին ԱՄՆ նախագահ Դոնալդ Թրամփի ներկայացուցիչների հետ բանակցություններն արդյունավետ է գնահատել։ «Մենք արդյունավետորեն աշխատել ենք նախագահ Թրամփի ներկայացուցիչների հետ, և այժմ ունենք մի քանի փաստաթղթերի նախագծեր։ Մասնավորապես, կան փաստաթղթեր Ուկրաինայի անվտանգության երաշխիքների, վերականգնման և այս պատերազմը դադարեցնելու հիմնական շրջանակի վերաբերյալ»,- գրել է Զելենսկին։

Նշվում է, որ փաստաթղթերում ամրագրված են դրույթներ, որոնք պետք է ապահովեն ռազմական գործողությունների իրական դադարեցումը և կանխեն Ռուսաստանի կրկնակի ներխուժումը։

Նշենք, որ դեկտեմբերի 20-ին և 21-ին ամերիկյան կողմը Ֆլորիդայում առանձին բանակցություններ է վարել ուկրաինական և ռուսական պատվիրակությունների հետ։