«Երևանի քաղաքապետարանի պատասխանատուներին երեք պարզագույն հարց ունեմ». Կարեն Հեքիմյան

Հասարակական գործիչ Կարեն Հեքիմյանի ֆեյսբուքյան գրառումը. «Պարզվում է՝ Երևանի Մետրոպոլիտենը և Երևանի ավտոբուսը մտածում են մեր մասին, ավելին՝ աշխատում են «առավելագույնս ապահովել մեր քաղաքացիների և մայրաքաղաքի հյուրերի հարմարավետությունը»: Ուրեմն, սրանք տեղեկացրել են, որ «Ամանորի և Սուրբ Ծննդյան տոների կապակցությամբ», «դեկտեմբերի 31-ին մետրոպոլիտենի աշխատանքը կսկսվի ժամը 07:00-ից և կշարունակվի մինչև 2026 թվականի հունվարի 1-ի ժամը 02:30-ը, իսկ ավտոբուսներինը՝ դեկտեմբերի 31-ին՝ 07:00-22:30,
հունվարի 1-ին և 2-ին՝ 08:00-22:30, հունվարի 3-ին և 4-ին՝ 07:00-22:30»: Ընդ որում, մետրոպոլիտենն ավետում է, որ «դեկտեմբերի 31-ի ժամը 23:45-ից մինչև հունվարի 1-ի ժամը 00:15-ը (30 րոպե) մետրոպոլիտենի «Հանրապետության հրապարակ» կայարանում գնացքները կանգառ չեն կատարելու»:
Այժմ Երևանի քաղաքապետարանի պատասխանատուներին երեք պարզագույն հարց ուղղեմ՝
1. Դուք պատկերացնո՞ւմ եք, թե ինչ է կատարվելու մետրոպոլիտենի «Զորավար Անդրանիկ» կայարանում դեկտեմբերի 31-ի ժամը 23:45-ից մինչև հունվարի 1-ի ժամը 00:15-ը:
2. Դուք գիտե՞ք, որ Երևանի հասարակական տրանսպորտի աշխատանքները սովորական օրերին սկսվում է առավոտյան՝ ժամը 7:00-ից և ավարտվում՝ 23:00-ի սահմաններում: Ստացվում է՝ «քաղաքացիների հարմարավետությունը» պահանջում է, որ հունվարի 1-ին և 2-ին տրանսպորտը 30, իսկ 3-ին և 4-ին 90 րոպե սովորականից քի՞չ աշխատի:
3. Սուրբ Ծնունդը նշվում է հունվարի 6-ին: Ինչո՞ւ մետրոպոլիտենի և «Երևանի ավտոբուս» ՓԲԸ-ի հայտարարությունների մեջ, թեպետ հիշատակվում է Սուրբ Ծնունդը, սակայն չի հրապարակվում հունվարի 6-ին մետրոպոլիտենի և տրանսպորտի աշխատանքային գրաֆիկը:
Կարող եք չպատասխանել: Առանց դրա էլ պարզ է՝ ինչպես հայտարարություններն, այդպես էլ պատասխանները կրելու են մանիպուլյատիվ բնույթ»: