«Եվրոպան կարող է ստեղծել անվտանգության նոր դաշինք առանց ԱՄՆ-ի»․ #Politico

Եվրոպայում քննարկվում է առանց ԱՄՆ-ի մասնակցության անվտանգության նոր դաշինքի ստեղծման հնարավորությունը, որին կարող է միանալ նաև Ուկրաինան: Այս մասին հաղորդում է Politico-ն:

Պարբերականի տվյալներով՝ Եվրոպայի համբերությունը սպառվել է, երբ ԱՄՆ-ի նախագահ Դոնալդ Թրամփը սպառնացել է պատժիչ մաքսատուրքեր սահմանել ցանկացած երկրի նկատմամբ, որը կփորձի խոչընդոտել Գրենլանդիան ձեռք բերելու իր մտադրությունները։

Նշվում է, որ եթե ԱՄՆ-ի մոտեցման մեջ արմատական փոփոխություններ չլինեն, ապա այս գործընթացը կարող է հանգեցնել Եվրոպայի արմատական վերակազմավորման և փոխել ուժերի համաշխարհային հավասարակշռությունը։ Եվրոպան պատրաստ է ստեղծելու սեփական անվտանգության դաշինք, և Ուկրաինան կարող է կարևոր դեր խաղալ այդ կառուցվածքում։

Նաև նշվում է, որ եվրոպական երկրները, այդ թվում՝ ԵՄ անդամ չհանդիսացող Մեծ Բրիտանիան և Նորվեգիան, արդեն արդյունավետորեն աշխատել են առանց ԱՄՆ-ի՝ Թրամփի երկրորդ ժամկետի մեծ մասի ընթացքում։ Այս ձևաչափը հանգեցրել է «Կամավորների կոալիցիայի» ձևավորմանը, որը ապագայում կարող է դառնալ նոր դաշինքի հիմքը: