«Եթե գործարք չկնքենք, կիմանանք՝ նա ճիշտ է, թե ոչ»․ Թրամփ

ԱՄՆ նախագահ Դոնալդ Թրամփը հայտարարել է, որ եթե ԱՄՆ-ին և Իրանին չհաջողվի հասնել համաձայնության, պարզ կդառնա՝ արդյոք նրանց միջև տարածաշրջանային մակարդակի հակամարտություն կսկսվի։

«Ինչո՞ւ նա դա չպետք է ասի։ Իհարկե, նա դա ասում է»,- մեկնաբանել է ԱՄՆ նախագահը Իրանի գերագույն առաջնորդ Ալի Խամենեիի այն խոսքերը, թե ԱՄՆ-ի ռազմական ագրեսիան Իսլամական Հանրապետության դեմ չի սահմանափակվի երկու երկրների միջև պատերազմով, այլ կվերածվի տարածաշրջանային լայնածավալ հակամարտության։ «Եթե մենք գործարք չկնքենք, կիմանանք՝ նա ճիշտ է, թե ոչ»,- հավելել է Թրամփը՝ պատասխանելով լրագրողների հարցերին։ ԱՄՆ նախագահը նաև հույս է հայտնել, որ Վաշինգթոնի և Թեհրանի միջև կհաջողվի հասնել պայմանավորվածությունների՝ շեշտելով, որ տարածաշրջանում տեղակայված են ամերիկյան զգալի ուժեր։

Ավելի վաղ Ալի Խամենեին հայտարարել էր. «Ամերիկացիները պետք է իմանան, որ եթե նրանք պատերազմ սկսեն, այս անգամ դա կլինի տարածաշրջանային մակարդակի»։