«Ստիպված ենք ամրապնդել մեր պաշտպանունակությունը»․ Լուկաշենկո

Բելառուսը ստիպված է ամրապնդել իր պաշտպանունակությունը։ Այս մասին հայտարարել է նախագահ Ալեքսանդր Լուկաշենկոն՝ զինված ուժերի հագեցման և ռազմաարդյունաբերական համալիրի զարգացմանը նվիրված խորհրդակցության ժամանակ։

Նրա խոսքով, որը մեջբերում է БелТА-ն, այսօրվա աշխարհում ինքնաբավ կարող է համարվել միայն այն պետությունը, որն առաջին հերթին ի վիճակի է ապահովել իր անվտանգությունը ռազմական ոլորտում:

Լուկաշենկոն նշել է, որ Բելառուսի սահմանների մոտ ռազմական ներկայության ավելացումը, հատկապես Լեհաստանի կողմից, միայն մտահոգիչ չէ։ «Մենք հասկանում ենք, որ դա հենց այնպես չի արվում։ Մարդիկ հենց այնպես փող չեն ծախսում տանկերի և զինամթերքի վրա։ Այդ պատճառով ժամանակին իմ կողմից որոշում է կայացվել, հաշվի առնելով Ռուսաստանի Դաշնության հատուկ ռազմական գործողությունը, զբաղվել մեր պաշտպանունակության ամրապնդմամբ է՛լ ավելի լուրջ մասշտաբներով»,- ասել է նա։