«ԱՄՆ-ն USS Gerald R. Ford ավիակիրը կտեղափոխի Մերձավոր Արևելք»․ #NYT

Ամերիկյան USS Gerald R. Ford ավիակիրը, որն աշխարհի ամենամեծ ավիակիրն է, և դրան ուղեկցող նավերը Կարիբյան ավազանից կվերատեղակայվեն Մերձավոր Արևելքում, հաղորդում է The New York Times-ը՝ հղում կատարելով աղբյուրներին։

Նրանց տեղեկություններով՝ նավի անձնակազմին տեղեկացրել են, որ Պարսից ծոցում այն կմիանա հարվածային խմբին, որը գլխավորում է Abraham Lincoln ավիակիրը։ Նշվում է, որ Gerald R. Ford-ը Նորֆոլկ (Վիրջինիա նահանգ) նավահանգստից հեռացել էր անցյալ տարվա հունիսին և հոկտեմբերին տեղափոխվել Կարիբյան ծով: Հունվարի 3-ին նավը մասնակցել է Վենեսուելայի մայրաքաղաք Կարակասի վրա հարձակմանը։

Անձնակազմը նախատեսում էր մարտի սկզբին վերադառնալ բազա, սակայն վերատեղակայման պատճառով նրանք, ամենայն հավանականությամբ, տուն չեն հասնի մինչև ապրիլի վերջը կամ մայիսի սկիզբը, նշում է թերթը։ Սա կխանգարի ժամանակին իրականացնել նավի անհրաժեշտ տեխնիկական սպասարկումը, ավելացնում է The New York Times-ը։