«Ամերիկացիները ստեղծել են մեր «Շահեդ»-ին նմանվող ԱԹՍ». Արաղչի

Միացյալ Նահանգները իրանական «Շահեդ» անօդաչու թռչող սարքի նմանությամբ ԱԹՍ է օգտագործում արաբական երկրների դեմ հարվածներ հասցնելու համար, հայտարարել է Իրանի արտաքին գործերի նախարար Աբբաս Արաղչին։

«Ամերիկացիները ստեղծել են մեր «Շահեդ»-ի նման անօդաչու թռչող սարք։ Նրանք այն անվանել են Lucas։ Նրանք այն օգտագործում են արաբական երկրներում թիրախներ հարվածելու համար», - ասել է նա։

Նախարարը նաև նշել է, որ արաբական պետությունների քաղաքացիական ենթակառուցվածքների վրա հարձակումների հետևում կարող է կանգնած լինել Իսրայելը՝ Թեհրանի հետ նրանց հարաբերությունները փչացնելու համար։

Արաղչին հավելել է, որ ԱՄՆ-ն և Իսրայելը Մերձավոր Արևելքի հակամարտությանը վերջ դնելու որևէ նախաձեռնություն չեն առաջարկում։

«Այնուամենայնիվ, մենք կողջունենք ցանկացած տարածաշրջանային նախաձեռնություն, որը կհանգեցնի հակամարտության արդարացի ավարտին», - ընդգծել է նա Al Araby Al Jadeed-ին տված հարցազրույցում։