Պուտինը սահմանափակել է կանխիկ ռուբլու և ոսկու դուրսբերումը ԵԱՏՄ երկրներ

Ռուսաստանի նախագահ Վլադիմիր Պուտինը հրամանագիր է ստորագրել, որով սահմանափակումներ են սահմանվում Եվրասիական տնտեսական միության երկրներ՝ Հայաստան, Բելառուս, Ղազախստան և Ղրղզստան, կանխիկ ռուբլու և ոսկու դուրս բերման նկատմամբ։

Ապրիլի 1-ից ֆիզիկական անձանց կարգելվի կանխիկ ռուբլի արտահանել 100 հազար դոլարին համարժեք գումարը գերազանցող գումարի չափով: Անհատ ձեռնարկատերերի և իրավաբանական անձանց համար արգելքը կգործի անկախ գումարի չափից։

Բացառություններ կկատարվեն այն դեպքերի համար, երբ արտահանումն իրականացվում է միջազգային օդանավակայանների օդային անցակետերի միջոցով: Այդպիսի դեպքերում պահանջվելու են արտահանող անձանց հաշիվներից միջոցների դուրսբերումը հաստատող բանկային քաղվածքներ:

Մայիսի 1-ից սկսած՝ կարգելվի 100 գրամից ավելի քաշ ունեցող ոսկու ձուլակտորների արտահանումը։ Այս սահմանափակումը վերաբերում է ֆիզիկական և իրավաբանական անձանց, ինչպես նաև անհատ ձեռնարկատերերին։

Բացառություն կկատարվի Մոսկվայի (Վնուկովո, Դոմոդեդովո և Շերեմետևո) և Վլադիվոստոկի (Կնևիչ) միջազգային օդանավակայանների օդային անցակետերով արտահանման համար: Արտահանման համար անհրաժեշտ կլինի Դաշնային փորձաքննության գրասենյակի թույլտվությունը: Այս փաստաթուղթն անհրաժեշտ կլինի նաև ֆիզիկական անձանց՝ ԵԱՏՄ անդամ չհանդիսացող երկրներ ոսկի արտահանելու համար։
Հրամանագրում նշվում է, որ «ազգային անվտանգությունը և ազգային շահերը պաշտպանելու նպատակով» ներդրվում է կանխիկ արժույթի և ոսկու ձուլակտորների արտահանման հատուկ ընթացակարգ։