«Տեսնում ենք, թե որքանով է «ուժեղի իրավունքը» փոխարինել միջազգային իրավունքին»․ Լուկաշենկո

Բելառուսի նախագահ Ալեքսանդր Լուկաշենկոն հայտարարել է, որ համաշխարհային ասպարեզում «ուժեղի իրավունքը» փոխարինել է միջազգային իրավունքին:

«Բելառուսը հարուստ և յուրօրինակ պատմություն ունեցող երկիր է։ Նրա ճակատագրական շրջադարձերը հաճախ կապված են եղել եվրոպական մայրցամաքի սրտում գտնվելու կարևորագույն դիրքի հետ։ Մի կողմից, սա անհերքելի առավելություն է։ Միևնույն ժամանակ, գտնվելով Արևմուտքի և Արևելքի միջև դարավոր մրցակցության կիզակետում, բելառուսական հողը բազմիցս դարձել է դաժան մարտերի թատերաբեմ։ Դրա մասին հիշողությունը փոխանցվում է սերնդեսերունդ՝ օգնելով մեզ պահպանել խաղաղությունը և ապրել ներդաշնակության մեջ», - ասել է նա՝ ընդունելով 10 երկրների դեսպանների հավատարմագրերը։

Լուկաշենկոյի խոսքով, որը մեջբերում է BelTA-ն, աշխարհը դարձել է փխրուն և խոցելի։ «Մենք տեսնում ենք, թե որքանով է «ուժեղի իրավունքը» փոխարինել միջազգային իրավունքին։ Որքան է կորել վստահությունը և մեծացել հակամարտության հավանականությունը», - նշել է Լուկաշենկոն։