«Իրանում գտնվող հարստացված ուրանը կարող է ոչ պիտանի լինել օգտագործման համար»․ Թրամփ

ԱՄՆ նախագահ Դոնալդ Թրամփը հայտարարել է, որ Իրանում գտնվող հարստացված ուրանն արդեն կարող է օգտագործման համար ոչ պիտանի լինել, սակայն, միևնույն է, պահանջում է այն փոխանցել Միացյալ Նահանգներին:

«Արժեքի տեսանկյունից այն (Իրանում գտնվող հարստացված ուրանը-խմբ.) մեծ նշանակություն չի ներկայացնում։ Հավանաբար այն չի կարելի օգտագործել։ Հնարավոր է, որ նրանք նույնիսկ չկարողանան այն դուրս բերել… Նրանք պետք է այն վերադարձնեն»,- հայտարարել է Թրամփը՝ Salem News-ին տված հարցազրույցում։

Ավելի վաղ Al Jazeera-ն՝ աղբյուրներին հղում կատարելով, հաղորդել էր, որ Իրանը ԱՄՆ-ին առաջարկել է երկարաժամկետ խաղաղության ծրագիր, որը, ի թիվս այլ կետերի, նախատեսում է ուրանի հարստացման սառեցում մինչև 15 տարի, որին կհաջորդի 3.6% սահմանաչափ՝ համաձայն «զրոյական պահեստավորման սկզբունքի»։