«Թայվանի հարցի սխալ կարգավորումը կարող է բախում առաջացնել Չինաստանի և ԱՄՆ-ի միջև»․ Սի Ցզինպին

Թայվանի հարցի կարգավորման նկատմամբ սխալ մոտեցումը կարող է բախում առաջացնել Պեկինի և Վաշինգթոնի միջև, հայտարարել է Չինաստանի նախագահ Սի Ցզինպինը ԱՄՆ նախագահ Դոնալդ Թրամփի հետ բանակցությունների ժամանակ։

«Թայվանի հարցը Չինաստան-ԱՄՆ հարաբերություններում ամենակարևորն է։ Եթե այն պատշաճ կերպով կարգավորվի, ապա երկու երկրների հարաբերությունները կկարողանան պահպանել ընդհանուր կայունությունը։ Իսկ եթե ոչ, ապա երկու պետությունները կբախվեն կամ նույնիսկ հակամարտության մեջ կմտնեն, ինչը երկկողմ հարաբերությունները կդնի չափազանց վտանգավոր իրավիճակի մեջ»,- Սի Ցզինպինի խոսքերը մեջբերում է Չինաստանի կենտրոնական հեռուստատեսությունը։

ՉԺՀ նախագահը հավելել է, որ «կղզու անկախության» ձգտումն ու տարածաշրջանում խաղաղությունը բացառում են միմյանց: Նրա խոսքով՝ Թայվանի նեղուցում կայունության պահպանումը կարևորագույն գործոն է Չինաստանի և Միացյալ Նահանգների հարաբերությունների համար:

Նշենք, որ Պեկինը Թայվանը համարում է ՉԺՀ-ի անբաժանելի մասը, և «մեկ Չինաստանի» սկզբունքին հետևելը պարտադիր պայման է ՉԺՀ-ի հետ դիվանագիտական ​​հարաբերություններ հաստատել կամ պահպանել ցանկացող այլ պետությունների համար։ Թայվանին ամերիկյան զենքի վաճառքը մնում է Վաշինգթոնի և Պեկինի հարաբերություններում լարվածության առանցքային կետերից մեկը։