«ՀԱՊԿ-ից ՀՀ-ի դուրս գալու որոշումը պետք է կայացնի երկրի ղեկավարությունը»․ Մասադիկով

Հավաքական անվտանգության պայմանագրի կազմակերպությունից (ՀԱՊԿ) Հայաստանի հնարավոր դուրս գալու վերաբերյալ որոշումը պետք է կայացնի երկրի ղեկավարությունը և ժողովուրդը։ Այս մասին հայտարարել է ՀԱՊԿ գլխավոր քարտուղար Թաալաթբեկ Մասադիկովը՝ կազմակերպության անդամ պետությունների պաշտպանության նախարարների խորհրդի նիստից հետո։

Նա նշել է, որ ՀԱՊԿ ղեկավարությունը շարունակում է Հայաստանը համարել կազմակերպության լիիրավ անդամ: «Այս հարցը նիստում չի քննարկվել։ Կարծում եմ՝ այն քաղաքական հարց է, և մինչ այս պահը ՀԱՊԿ-ն Հայաստանին համարում է կազմակերպության լիիրավ անդամ։ Հայաստանի Հանրապետությունից այլ ցուցումներ կամ որոշումներ չեն ստացվել։ Հռետորաբանությունը, որը հնչում է Հայաստանի քաղաքական գործիչների կամ այլ պետությունների կողմից՝ լինի նախընտրական, թե հետընտրական, տարբեր է»,- ասել է նա։