ԱՄՆ-ն և Իրանը համաձայնեցրել են վերջնական համաձայնագրին հասնելու ճանապարհային քարտեզը

ԱՄՆ-ի և Իրանի միջև Շվեյցարիայում կայացած բանակցություններում համաձայնեցվել է վերջնական համաձայնության հասնելու ճանապարհային քարտեզը: Այս մասին ասվում է Կատարի և Պակիստանի ԱԳ նախարարությունների համատեղ հայտարարության մեջ, որոնք հանդես են եկել որպես միջնորդներ։
Փաստաթղթում նշվում է, որ հանդիպումն անցել է դրական և կառուցողական մթնոլորտում, ձեռք են բերվել հուսադրող արդյունքներ, այդ թվում՝ ստեղծվել է մեխանիզմ տեխնիկական հետագա բանակցությունների անցկացման համար: Կողմերը, ի թիվս այլ հարցերի, պայմանավորվել են ստեղծել բարձր մակարդակի հանձնաժողով, որը կապահովի միջնորդության քաղաքական վերահսկողությունը:
«Հանձնաժողովը համաձայնեցրել է 60 օրվա ընթացքում վերջնական համաձայնագրին հասնելու ճանապարհային քարտեզը։ Բացի այդ, փոխըմբռնման հուշագրի 5-րդ կետով սահմանված ժամկետներում կողմերի միջև ստեղծվել է հաղորդակցության ուղի՝ միջադեպերն ու թյուրըմբռնումները կանխելու նպատակով, որպեսզի ապահովվի առևտրային նավերի անվտանգ անցումը Հորմուզի նեղուցով»,- ասվում է հայտարարության մեջ։

Նշենք, որ երեկ Շվեյցարիայի Բյուրգենշտոկ քաղաքում մեկնարկել են Իրանի և ԱՄՆ-ի միջև տեխնիկական բանակցությունները՝ միջնորդ երկրներ Պակիստանի և Կատարի մասնակցությամբ։