«Էրդողանը կոչ է անում ոչնչացնել Իսրայելը. մենք կդիմենք ԱՄՆ-ին»․ Նեթանյահու

Իսրայելի վարչապետ Բենիամին Նեթանյահուն կառավարության նիստի ժամանակ բողոքել է Թուրքիայի նախագահ Ռեջեփ Թայիփ Էրդողանի՝ հրեական պետությունը ոչնչացնելու սպառնալիքներից: Այս մասին հայտնում է The Times of Israel-ը։

«Օր չկա, որ Էրդողանը Իսրայելին ոչնչացնելու կոչ չանի։ Մենք այդ խոսքերին շատ լուրջ ենք վերաբերվում, քանի որ եթե մենք ինչ-որ բան սովորել ենք մեր ժողովրդի պատմությունից, դա այն է, որ երբ ինչ-որ մեկն ասում է, որ մտադիր է ձեզ ոչնչացնել, դրան արժե լուրջ վերաբերվել»,- հայտարարել է Նեթանյահուն։

Իսրայելի վարչապետը հավելել է, որ մտադիր է «ամերիկացի ընկերների ուշադրությունը հրավիրել Էրդողանի արտահայտությունների վրա»՝ շեշտելով, որ Իսրայելը չի անտեսում այդ խոսքերը:

Նեթանյահուն չի հստակեցրել, թե Թուրքիայի նախագահի հատկապես որ մեջբերումն է նկատի ունեցել։ Մայիսին Էրդողանն Իսրայելի վարչապետին անվանել էր բռնապետ և խոստացել նրան «արժանի դաս»։ Ավելի ուշ նա նաև հայտարարել էր, որ Նեթանյահուն և «նրա հանցավոր ցանցը» Սիրիայի և Լիբանանի վրա իրենց հարձակումներով իրավիճակը հասցրել են մի կետի, երբ այն արդեն սպառնալիք է նաև Թուրքիայի համար։