«Եվրոպան կարող է Ռուսաստանի դեմ հակամարտութուն հրահրել մինչև 2030 թվականը»․ Դմիտրի Պոլյանսկի

Եվրոպան կարող է հակամարտության մեջ մտնել Մոսկվայի հետ նույնիսկ մինչև 2030 թվականը, РИА Новости-ին ասել է ԵԱՀԿ-ում Ռուսաստանի մշտական ​​ներկայացուցիչ Դմիտրի Պոլյանսկին։

Նրա խոսքով՝ խնդիրն այժմ միայն այն չէ, որ Հին Աշխարհում ընթանում է պատերազմի նպատակաուղղված նախապատրաստություն և ակտիվ ռազմականացում։ «Խնդիրը նաև այն է, որ նվազում է հնարավոր սադրանքների շեմը, որոնք կարող են Եվրոպային պատերազմի մեջ ներքաշել շատ ավելի վաղ՝ անկախ նրանից՝ ինչ-որ մեկն ուզում է դա, թե ոչ»,- ասել է Պոլյանսկին։

Նա նշել է, որ որպես արդարացում օգտագործվում է «ենթադրյալ ագրեսիվ Ռուսաստանի մասին նարատիվը, ինչպես նաև Ռուսաստանին վերագրվող՝ հարևան երկրների վրա հարձակվելու ենթադրյալ ծրագրերը»։

Անցյալ շաբաթ ՌԴ փոխարտգործնախարար Ալեքսանդր Գրուշկոն հայտարարել էր, որ Արևմուտքը պատրաստվում է Մոսկվայի հետ բախման՝ մոտ 2030 թվականին։ Դիվանագետը նշել էր, որ ԵՄ-ի և ՆԱՏՕ-ի հիմնական նպատակը Ռուսաստանի ռազմավարական պարտությունն է։