«Իսրայելը կմնա Լիբանանի հարավում մինչև «Հեզբոլլահ»-ի զինաթափումը»․ Իսրայել Կաց

Իսրայելը չի ​​դուրս բերի իր զորքերը Լիբանանի հարավում գտնվող անվտանգության գոտուց, քանի դեռ չի զինաթափվել «Հեզբոլլահ» շարժման զինյալ թևը և չի ապահովվել հրեական պետության հյուսիսում բնակվողների անվտանգությունը, ասվում է Իսրայելի պաշտպանության նախարար Իսրայել Կացի հայտարարության մեջ։

«Մեր իրավունքն ու պարտականությունն է՝ պաշտպանել Իսրայելի հյուսիսի բնակիչներին ահաբեկչական «Հեզբոլլահ»-ի սպառնալիքներից, որը ձգտում է ոչնչացնել Իսրայել պետությունը։ Մենք կշարունակենք մնալ Լիբանանի անվտանգության գոտում և այնտեղից գործել այնքան ժամանակ, որքան անհրաժեշտ կլինի, մինչև «Հեզբոլլահը» զինաթափվի ամբողջ Լիբանանի տարածքում, և Իսրայելի հյուսիսի բնակիչների նկատմամբ սպառնալիքը վերանա», - հայտարարել է Կացը։ Նրա խոսքերը մեջբերում է Ynet-ը։

Կացի խոսքով՝ Իսրայելը «ոչ ոքից թույլտվություն չի ստացել Լիբանան մտնելու համար» և «թույլտվության կարիք չունի՝ այնտեղ մնալու համար»։ Ynet-ը նշում է, որ Իսրայելի պաշտպանության նախարարն այս կերպ արձագանքել է ԱՄՆ-ի նախագահ Դոնալդ Թրամփի՝ ավելի վաղ արած հայտարարությանը, ըստ որի՝ Իսրայելը ձեռք բերված պայմանավորվածությունների շրջանակում դուրս կբերի իր զորքերը Լիբանանից։