Պակիստանը կոչ է արել Իրանին և ԱՄՆ-ին դադարեցնել ռազմական գործողությունները

Պակիստանի ԱԳՆ-ն կոչ է անում Թեհրանին և Վաշինգթոնին դադարեցնել ռազմական գործողությունները և վերսկսել վիճահարույց հարցերի լուծման շուրջ բանակցությունները:

«Պակիստանը կշարունակի կողմերին կոչ անել դադարեցնել բռնությունը և վերսկսել տեխնիկական բանակցությունները՝ փոխըմբռնման հուշագրի համաձայն», - հայտարարել է ԱԳՆ ներկայացուցիչ Թահիր Անդրաբին՝ հավելելով, որ հակամարտությունը պետք է լուծվի բանակցությունների սեղանի շուրջ։

Պակիստանի միջնորդությամբ Իրանի և ԱՄՆ-ի միջև ստորագրված փոխըմբռնման հուշագրի համաձայն՝ կողմերը նախատեսում էին 60 օրվա ընթացքում տեխնիկական բանակցություններ անցկացնել Իրանի միջուկային ծրագրի շուրջ՝ վերջնական համաձայնության հասնելու համար։ Ամերիկյան լրատվամիջոցների հաշվարկներով՝ այդ 60-օրյա ժամկետը կլրանա օգոստոսի 17-ին։

Նշենք, որ վերջին օրերին ԱՄՆ-ն և Իրանը փոխադարձ հարվածներ են հասցնում միմյանց։