Սարդինիայում հայտնաբերվել է 3800-ամյա հսկայի դամբարան

Հնագետները Սարդինիայում հայտնաբերել են հսկայի դամբարան։ Իտալիայի մշակույթի նախարարության տվյալներով՝ տրախիտային բլոկներից պատրաստված երկհարկանի կառույցը գտնվում է Մակոմեր քաղաքի մոտակայքում՝ 740 մետր բարձրության վրա։

Հուշարձանը հայտնաբերվել է Կարարսու-Իդդիա տարածքում պեղումների ժամանակ։ Դամբարանը տարիներ շարունակ թաքցված է եղել թփուտներում։ Ներսում պահպանվել է թաղման խցիկ և մուտքի առջև գտնվող հուշարձանային կիսաշրջանաձև էկզեդրա։ Կառույցը եզակի է նրանով, որ մուտքի մոտ գտնվող տարածքը բաժանված է երկու մակարդակի։ Նման կառույցը չափազանց հազվադեպ է, ուստի հայտնագործությունը կարող է փոխել մեր պատկերացումները Նուրագյան քաղաքակրթության շինարարական տեխնոլոգիաների և ծեսերի մասին։

Հսկաների դամբարաններն առաջացել են մ.թ.ա. մոտ 1800 թվականին։ Դրանք ծառայել են՝ որպես կոլեկտիվ թաղման վայրեր։ Կիսաշրջանաձև էկզեդրան օգտագործվել է նախնիներին նվիրված արարողությունների համար։ Պեղումների ժամանակ մասնագետները հայտնաբերել են կերամիկա, որը հաստատում է տարածքում վաղ մարդկային բնակության փաստը։ Սակայն հետազոտողները նաև փաստագրել են անօրինական պեղումների ապացույցներ: Դամբարանի շուրջ հայտնաբերվել են նախապատմական ժամանակներից մինչև հռոմեական դարաշրջան մարդկային բնակության ապացույցներ: Տեղանքն ավելի մեծ համալիրի մաս է կազմում, որը ներառում է նաև պրոտոնուրագներ՝ սրբազան ջրհոր և բնակավայր:

Սարդինիայում գտնվող Նուրագները հայտնի են՝ որպես «հսկաների դամբարաններ», քանի որ, ըստ լեգենդի, Նուրագները բարձրահասակ էին: Սակայն այս հին քաղաքակրթության ներկայացուցիչների արտաքին տեսքի մասին հուսալի տեղեկություններ չկան. նրանց մնացորդները չեն պահպանվել: