Ռուսաստանն ու Հայաստանը քննարկում են Վլադիկավկազում և Կապանում դիվանագիտական ներկայացուցչություններ բացելու հարցը

Ռուսաստանն ու Հայաստանը քննարկում են նոր դիվանագիտական ներկայացուցչությունների բացման հարցը։ Այս մասին «Ռիա նովոստի»-ին հայտնել է Վլադիկավկազում ՌԴ ԱԳՆ ներկայացուցչության ղեկավար Բագիր Մամիևը։

«Այսօրվա դրությամբ այդ հարցը (Վլադիկավկազում Հայաստանի հյուպատոսական բաժին բացելու հարցը — խմբ.) և Կապանում Ռուսաստանի գլխավոր հյուպատոսություն բացելու հարցը երկկողմ օրակարգից հանված չէ, սակայն որևէ հստակ ժամկետների մասին խոսելը վաղաժամ է», - ասել է Մամիևը։

Միաժամանակ նա նշել է, որ Վլադիկավկազում ՌԴ ԱԳՆ ներկայացուցչությունը կայուն աշխատանքային կապ է հաստատել Ռոստովի մարզի Դոնի Ռոստով քաղաքում Հայաստանի գլխավոր հյուպատոսության հետ, այդ թվում՝ «Վերին Լարս» անցակետում հայ փոխադրողներին վերաբերող հարցերի շուրջ։ Այդ անցակետը շարունակում է մնալ Ռուսաստանը Վրաստանի, իսկ այնուհետև՝ Հայաստանի հետ կապող միակ ցամաքային երթուղին։