«Գերմանիայի հետ Ուկրաինայի հարցով պաշտոնական բանակցություններ չեն եղել»․ Գալուզին

Ռուսական կողմը Գերմանիայի Դաշնային Հանրապետության հետ ոչ մի պաշտոնական բանակցություններ չի վարել ուկրաինական հարցի կարգավորման շուրջ։ Այս մասին ТАСС-ին տված հարցազրույցում հայտնել է ՌԴ փոխարտգործնախարար Միխայիլ Գալուզինը։

«Ուկրաինական հարցի կարգավորման շուրջ ԳԴՀ-ի հետ որևէ պաշտոնական շփում չի եղել և չկա, և դժվար թե դրանք հնարավոր լինեն՝ հաշվի առնելով Գերմանիայի քաղաքական ղեկավարության ծայրահեղ ագրեսիվ հակառուսական հռետորաբանությունն ու գործնական քայլերը»,- նշել է փոխնախարարը։

Միևնույն ժամանակ, Գալուզինը մատնանշել է հասարակական խմբերի ներկայացուցիչների միջև տեղի ունեցող ոչ պաշտոնական շփումները։ «Ինչ վերաբերում է Ռուսաստանի և Գերմանիայի տարբեր հասարակական կառույցների ներկայացուցիչների ոչ պաշտոնական հանդիպումներին, ապա դրանք եղել են և շարունակվում են»,- ասել է դիվանագետը։

Ավելի վաղ Ադրբեջանի նախագահ Իլհամ Ալիևը հայտնել էր, որ Բաքվում տեղի են ունեցել Ռուսաստանի և ԳԴՀ-ի ներկայացուցիչների միջև շփումներ՝ ուկրաինական հարցի կարգավորման շուրջ։