Իրակլի Ղարիբաշվիլիին նոր մեղադրանք է ներկայացվել

Վրաստանի գլխավոր դատախազությունը նոր քրեական գործ է հարուցել կալանքի տակ գտնվող երկրի նախկին վարչապետ Իրակլի Ղարիբաշվիլիի դեմ՝ կոռուպցիայի և առանձնապես խոշոր չափերով կաշառք ստանալու մեղադրանքով։

Գլխավոր դատախազության տարածած հաղորդագրության համաձայն՝ Ղարիբաշվիլին 750 հազար լարիի (մոտ 300 հազար դոլար) կաշառք է ստացել Վրաստանի պաշտպանության նախկին նախարար Ջուանշեր Բուրչուլաձեից, որը նույնպես կոռուպցիայի համար պատիժ է կրում։ Վերահսկող մարմնի տվյալներով՝ գործը վերաբերում էր Վրաստանի պաշտպանության նախարարության համար բժշկական սարքավորումների ձեռքբերմանը։ Բժշկական սարքավորումների մատակարարման գները էապես ուռճացված են եղել։

Դատախազությունը դատարան է դիմել՝ Ղարիբաշվիլիի դեմ դատական քննություն նշանակելու միջնորդությամբ։

Յոթ ամիս առաջ Ղարիբաշվիլին ձերբակալվել էր եկամուտների ապօրինի օրինականացման մեղադրանքով և դատապարտվել էր հինգ տարվա ազատազրկման։