Իսրայելն ու Հունաստանը 3 միլիարդ եվրոյի պաշտպանական համաձայնագիր են ստորագրել

Իսրայելն ու Հունաստանը շուրջ 3 միլիարդ եվրոյի համաձայնագիր են ստորագրել, որը նախատեսում է Իսրայելի կողմից Հունաստանի համար բազմաշերտ հակաօդային պաշտպանության համակարգի ստեղծում։

Ինչպես հայտնում է The Times of Israel-ը, այս մասին ասվում է Իսրայելի պաշտպանության նախարարության հայտարարության մեջ։

Համաձայնագրի շրջանակում, որը ստացել է «Աքիլեսի վահան» անվանումը, Հունաստանին կմատակարարվեն իսրայելական մի շարք համակարգեր, այդ թվում՝ Rafael ընկերության արտադրության David's Sling և SPYDER, ինչպես նաև Israel Aerospace Industries-ի արտադրության BARAK MX համակարգերը։

Իսրայելի պաշտպանության նախարարությունում գործարքն անվանել են իսրայելա-հունական հարաբերությունների պատմության մեջ պաշտպանական արտադրանքի արտահանման խոշորագույն համաձայնագիրը և Իսրայելի պատմության մեջ նմանատիպ խոշորագույն գործարքներից մեկը։

Համաձայնագիրը ստորագրվել է Թել Ավիվում։ «Համաձայնագրի շրջանակում Իսրայելը Հունաստանի համար կստեղծի համապարփակ բազմաշերտ հակաօդային պաշտպանության համակարգ, որն ամբողջությամբ հիմնված կլինի իսրայելական արտադրության համակարգերի և պատերազմի ընթացքում Իսրայելի պաշտպանական գերատեսչության կուտակած հարուստ օպերատիվ փորձի վրա», — ասվում է հայտարարության մեջ։

Նշվում է, որ սա առաջին դեպքն է, երբ Իսրայելը մեկ այլ երկրի կմատակարարի պաշտպանության միջոցների ամբողջական համալիր, որը նախատեսված է սպառնալիքների լայն շրջանակից, այդ թվում՝ բալիստիկ հրթիռներից և անօդաչու թռչող սարքերից պաշտպանվելու համար։

Բացի այդ, կողմերը ստորագրել են ևս 26 միլիոն եվրոյի համաձայնագիր՝ Հունաստանին Rafael ընկերության արտադրության Drone Dome համակարգերը վաճառելու վերաբերյալ։