Ուկրաինական ԱԹՍ-ների հարվածների հետևանքով Սոչիի նավթաբազայի տարածքում հրդեհ է բռնկվել

Ուկրաինական անօդաչու սարքերը հարձակվել են Սոչիի և «Սիրիուս» դաշնային տարածքի վրա․ հարվածների հետևանքով նավթաբազայում հրդեհ է բռնկվել, քաղաքի երկինքը պատվել է սև ծխով, իսկ օդանավակայանի աշխատանքը մի քանի ժամով սահմանափակվել է։

Մոնիթորինգային ալիքները գրում են, որ Սոչի քաղաքում հարձակման է ենթարկվել «Լուկօյլի» կամ «Ռոսնեֆտի» նավթաբազան։ Astra-ն գրում է, որ խոսքը «Ռոսնեֆտ-Կուբաննեֆտեպրոդուկտ» ընկերության նավթաբազայի մասին է։

Astra-ի տվյալներով՝ հարվածներից հետո հրդեհ է բռնկվել Աբխազիայի հետ սահմանին մոտ գտնվող Սիրիուս ավանի շրջանում։ Լրատվամիջոցի տեղեկություններով՝ այնտեղ տեղակայված է Ս-300 կամ Ս-400 զենիթահրթիռային համակարգ։

Հաղորդվում է, որ ԱԹՍ-ները հարձակվել են նաև Բաշկորտոստանի Ստերլիտամակ քաղաքի վրա։ Ուֆայի օդանավակայանը նույնպես ժամանակավորապես դադարեցրել է չվերթները։ Exilenova+-ը հարձակման թիրախ է անվանել Ստերլիտամակի նավթաքիմիական գործարանը, իսկ Supernova+-ը՝ «Ավանգարդ» դաշնային պետական ձեռնարկության պաշտպանական նշանակության օբյեկտը։