Եմենում հայտարարվել է ընդհանուր զորահավաք` ընդդեմ հուսիների

Եմենի Ներկայացուցիչների պալատը առցանց նիստում հաստատել է Եմենի նախագահական կառավարման խորհրդի ղեկավար Ռաշադ ալ-Ալիմիի խնդրանքը՝ հուսիներին հակազդելու համար ընդհանուր զորահավաք հայտարարելու վերաբերյալ: Այս մասին հայտնել է Եմենի կառավարության SABA լրատվական գործակալությունը:

Միջոցառումն ուժի մեջ է մտնում հայտարարման պահից և ուժի մեջ կմնա մինչև դրա ընդունմանը հանգեցրած հանգամանքների վերացումը: Խորհրդի հայտարարության համաձայն՝ որոշումը հիմնված է Եմենի Սահմանադրության 37-րդ հոդվածի վրա, որը կարգավորում է ընդհանուր զորահավաքը, ինչպես նաև ազգային պաշտպանության, արտակարգ միջոցառումների և քաղաքացիական պաշտպանության վերաբերյալ այլ սահմանադրական և իրավական դրույթներ:

Խորհուրդը նաև վերահաստատել է իր աջակցությունը Սաուդյան Արաբիայի գլխավորած արաբական կոալիցիային և կոչ է արել ազգային միասնության և քաղաքական ուժերի համակարգման:

Ալիմին նախկինում համաներում էր հայտարարել շարժման այն անդամների համար, ովքեր հրաժարվում են հուսիների համար կռվելուց կամ աշխատելուց:

Վերջին շաբաթներին հուսիներն ակտիվացրել են Եմենի կառավարական ուժերի և Սաուդյան Արաբիայի վրա հարձակումները: Խմբավորումը գրավել է Կարմիր ծովի ափի զգալի մասը և շարունակում է կռվել երկրի ներսում: