ԱՀԿ-ում «Ռեմդեսիվիր»-ն անվանել են #COVID_19-ի դեմ «հուսադրող» դեղամիջոց

1718

Շաբաթ, 04 հուլիսի, 2020 թ., 15:15

Հակավիրուսային դեղամիջոցների փորձարկումների ընթացքում միայն Ռեմդեսիվիր պրեպարատն է ցուցադրել հուսադրող արդյունքներ՝ COVID-19-ի դեմ: Այս մասին հայտնել է Առողջապահության համաշխարհային կազմակերպության (ԱՀԿ) գլխավոր տնօրենի տեղակալ Սումիա Սվամինաթանը: Ճեպազրույցը հեռարձակվել է ԱՀԿ-ի թվիթերյան էջում:

Ըստ նրա՝ ուսումնասիրությունները ցույց են տվել, որ դեղամիջոցի ընդունումը հիվանդներին թույլ է տալիս ավելի արագ ապաքինվել: Ռեմդեսիվիր ստացած վարակակիրները 15 օրվա փոխարեն ապաքինվել են 11 օրում:

Հիշեցնենք՝ ավելի վաղ The Guardian-ը հայտնել էր, որ Միացյալ Նահանգները կորոնավիրուսի բուժմանը նպաստող Ռեմդեսիվիր դեղամիջոցի ավելի քան 500000 չափաբաժին է ձեռք բերել՝ եվրոպական և այլ երկրներին գրեթե զրկելով դեղամիջոցի հասանելիության հնարավորությունից։