Հնագետներն Իսպանիայում հին հռոմեական արդյունաբերական մասշտաբի գինեգործության հետքեր են հայտնաբերել

Իսպանիայի Արագոն շրջանում՝ հին հռոմեական գինեգործական համալիրում, հնագիտական պեղումների ընթացքում, գիտնականների կարծիքով, հայտնաբերվել է գինու ճզման հսկայական՝ 5 հազար լիտր տարողությամբ ավազան։ Այս գտածոն կարող է վկայել այն մասին, որ գինին այստեղ արտադրել են ոչ միայն սեփական կարիքների համար, այլև ավելի մեծ ծավալներով, գրում է Wine-Searcher-ը։

Գտածոն թվագրվում է մ.թ. 1–5-րդ դարերով և գտնվում է «Լոս Պատրասիալես» (Los Patrasiales) կոչվող վայրում, որը հնագետներին արդեն իսկ լավ հայտնի է. այստեղ առաջին հնագիտական ​​գտածոները հայտնաբերվել էին դեռևս 2022 թվականին։

Պեղումների վայրում հայտնաբերվել են նաև մեծ քարեր։ Գիտնականների կարծիքով՝ դրանք կարող էին ծառայել որպես հակակշիռ՝ գինու պատրաստման մեծ մամլիչի համար։ Իսկ գինու ավազանները փորված են եղել անմիջապես ժայռի մեջ։

Նման մամլիչով հնարավոր էր միաժամանակ մշակել մինչև 7 տոննա խաղող։ Սա զգալիորեն ավելին է, քան անհրաժեշտ էր տնային օգտագործման համար։ Հետևաբար, ինչպես գրում է պարբերականը, գինեգործարանը, հավանաբար, ունեցել է առևտրային նշանակություն։

Հնագետները նախկին Հռոմեական կայսրության տարածքում հաճախ են հայտնաբերում գինեգործությանն առնչվող գտածոներ։ Օրինակ՝ 2024 թվականին Իտալիայի Կամպանիա մարզում հայտնաբերվել են հնագույն վիլլայի պատի բեկորներ. ենթադրվում է, որ հենց այստեղ է արտադրվել հայտնի ֆալերնյան գինին։ Ըստ Պլինիոս Ավագի վկայության՝ սա միակ գինին էր, որը կրակի հետ շփվելիս բռնկվում էր։