«Մովսես Հակոբյանն ասաց այն, ինչ տեսել և, ըստ այդմ՝ մտածում էր». Սենոր Հասրաթյան

Արցախի Հանրապետության ՊՆ նախկին խոսնակ Սենոր Հասրաթյանը ֆեյսբուքյան իր էջում գրել է. «Արցախի հերոս Մովսես Հակոբյանն այսօր հրավիրված մամուլի ասուլիսում, իմ կարծիքով, ասաց այն, ինչ տեսել և, ըստ այդմ՝ մտածում էր: Ասուլիսից հետո գեներալը հրավիրվեց ՀՔԾ: Թե ինչու և ինչ կլինի հետո, դժվարանում եմ ասել, բայց այն, որ գեներալ Հակոբյանն իր կենսագրությամբ բազմիցս ապացուցել է հայրենասեր զինվորական լինելու իր անդավաճան կեցվածքի իրողությունը, գոնե, նրան ճանաչողների համար, դա ակնհայտ է: Իսկ ահա, թե ինչ էր քիչ առաջ Պետրոս Ղազարյանի հետ տեղի ունեցած հեռուստատեսային հանդիպման ընթացքում բարբաջում դասալիք բաբաջանյան արմանը Մովսես Հակոբյան հերոսի մասին, թողնում եմ բոլոր նրանց խղճին, ովքեր համբերություն են ունեցել ունկնդրելու այդ հարցազրույցը: Արժեքների խոտանը գնալով, ցավալիորեն, տարածվում է»: