Փիղը վնասել է կրկեսի աշխատակցին

Կազանում փիղը վնասել է կրկեսի աշխատակցին, տղամարդուն տեղափոխել են հիվանդանոց։ Այս մասին РИА Новости-ին հաղորդել է Թաթարստանի Առողջապահության նախարարության ներկայացուցիչը։
«Տղամարդը հոսպիտալացվել է, նրա վիճակը գնահատվում է միջին ծանրության»,- ասել են գերատեսչությունից:
Նշվում է, որ միջադեպը տեղի է ունեցել մարտի 29-ի գիշերը, կենդանին «հրել է» տղամարդուն, գրում է գործակալությունը:
Կրկեսի կայքում հաղորդագրություն է հայտնվել. «Ավելի վաղ «Փղերի շոու և կրկեսի կախարդանք» ծրագրում փոփոխություններ են տեղի ունեցել՝ կապված փղերի հետագա մասնակցության անհնարինության հետ»:
Հավելել են նաև, որ փղերին անհրաժեշտ է շուրջօրյա խնամք, պետք է շարունակել պահպանել նրանց կենսագործունեությունը։
«Ներկայում պարզվում են միջադեպի բոլոր հանգամանքները և այն, թե արդյոք աշխատանքային խումբը խախտել է անվտանգության կանոնները, քննարկվում են հետագա կացության առավել ընդունելի պայմանները»,- նշել են կրկեսում:
Մարտի 21-ին հաղորդվել էր, որ Կազանի կրկեսում ներկայացման ժամանակ 2 փիղ կռվել են, մի կենդանին հատակին է գցել մյուսին։
Հաջորդ օրը քննիչները ստուգումներ են սկսել «Կազանի կրկեսում՝ ագրեսիվ վիճակում փղերին մանեժի վրա բաց թողնելու փաստով»: