Ուրբաթ, 27 մարտի, 2026 թ.
|
Ստեփանակերտում`   +8 °C

Ռուս տիեզերագնացը տիեզերքում գտնվելու ռեկորդ է սահմանել

Ռուս տիեզերագնացը տիեզերքում գտնվելու ռեկորդ է սահմանել
19686
Կիրակի, 04 փետրվարի, 2024 թ., 18:36

Ռուս տիեզերագնաց Օլեգ Կոնոնենկոն տիեզերքում անցկացրած ընդհանուր ժամանակի համաշխարհային ռեկորդ է սահմանել։ Կիրակի օրը՝ փետրվարի 4-ին, նա գերազանցել է մեկ այլ ռուս տիեզերագնաց Գենադի Պադալկայի ռեկորդն, ով տիեզերքում, ընդհանուր առմամբ, անցկացրել էր 878 օր 11 ժամ։ Սպասվում է, որ մինչև հունիսի 5-ը Կոնոնենկոն կդառնա պատմության մեջ առաջին մարդն, ով կմնա տիեզերքում 1000 օր։

Օլեգ Կոնոնենկոն իր առաջին թռիչքը տիեզերք կատարել է 2008 թվականին՝ «Սոյուզ» տիեզերանավի անձնակազմի կազմում։ Ներկայիս արշավախումբը հինգերորդն էր նրա կյանքում։ Ակնկալվում է, որ այն կավարտվի 2024 թվականի սեպտեմբերին, իսկ ավարտից հետո տիեզերագնացի թռիչքի ընդհանուր ժամանակը կկազմի 1100 օր։

Միջազգային համագործակցությունը տիեզերքում շարունակվում է՝ չնայած պատերազմին
Տիեզերական համագործակցությունն այն եզակի ոլորտներից մեկն է, որը գործնականում անմասն մնաց Ուկրաինայի դեմ Ռուսաստանի պատերազմից: ՆԱՍԱ-ի ղեկավար Բիլ Նելսոնի խոսքով՝ Ուկրաինայի պատերազմը «փոխեց ամեն ինչ երկրի վրա» և Եվրոպան և Միացյալ Նահանգները դիրքավորեց Ռուսաստանի դեմ։ «Սակայն դա չի փոխել համագործակցությունը Միջազգային տիեզերակայանում: Այս համագործակցությունը շարունակվում է: Դա է պրոֆեսիոնիզմը»,- Նելսոնի խոսքերը մեջբերել է ճապոնական Nikkei թերթը:

Այսօր միջազգային տիեզերակայանում միաժամանակ տեղակայվում են տիեզերագնացներ Ռուսաստանից, ԱՄՆ-ից, Դանիայից և Ճապոնիայից։