Դոնալդ Թրամփը կոշտ պատժամիջոցներ է խոստացել Կոլումբիային

Նախագահ Դոնալդ Թրամփը հայտարարել է, որ Միացյալ Նահանգները լայնածավալ պատժամիջոցներ կսահմանի Կոլումբիայի դեմ և մաքսատուրքեր կսահմանի Միացյալ Նահանգներ առաքվող կոլումբիական բոլոր ապրանքների համար: Այս մասին հայտնում է Reuters-ը։

Այսպես է արձագանքել ԱՄՆ-ի նախագահը Կոլումբիայի իշխանությունների քայլին, որով վերջիններս վարէջքի թույլտվություն չէին տվել ԱՄՆ-ից արտաքսված անօրինական միգրանտներ տեղափոխող երկու ռազմական ինքնաթիռներին:

«Այս հրամանը տվել է Կոլումբիայի սոցիալիստ նախագահ Գուստավո Պետրը, ով առանց այդ էլ շատ ոչ սիրված է իր ժողովրդի կողմից»,- գրել է Թրամփը սոցցանցերի իր Truth Social էջում՝ հավելելով, որ Կոլումբիայի նախագահի որոշումը «խաթարում է Միացյալ Նահանգների ազգային անվտանգությունն ու հասարակական անվտանգությունը»:

Այդ իսկ պատճառով ԱՄՆ-ի նախագահը որոշել է, որ Կոլումբիայից ներմուծվող ապրանքների վրա պետք է հենց հիմա սահմանել 25 տոկոս մաքսատուրք, իսկ մեկ շաբաթում դրանք հասցնել 50 տոկոսի։ Միևնույն ժամանակ, Կոլումբիայից բոլոր ապրանքները, ինչպես նշում է Թրամփը, կենթարկվեն «ուժեղացված ստուգումների» սահմանին։ Բացի այդ, Կոլումբիայի բոլոր պաշտոնյաներին, ինչպես նաև «բոլոր դաշնակիցներին և համախոհներին» կարգելվի մուտք գործել Միացյալ Նահանգներ և անմիջապես կչեղարկվեն նրանց վիզաները։

«Եվ այս միջոցները միայն սկիզբն են»,- սպառնացել է Թրամփը: «Մենք թույլ չենք տա Կոլումբիայի կառավարությանը խախտել իր օրինական պարտավորությունները՝ ընդունելու հանցագործներին, որոնց նրանք ուղարկել են Միացյալ Նահանգներ»։

Մեքսիկան ևս ավելի վաղ հրաժարվել էր ընդունել արտաքսման թռիչքներ Միացյալ Նահանգներից։