«Ուկրաինան այլևս գոյություն չէր ունենա՝ առանց ԱՄՆ-ի առատաձեռնության». Վենս

ԱՄՆ փոխնախագահ Ջեյ Դի Վենսը Ուկրաինայի նախագահ Վլադիմիր Զելենսկուն խորհուրդ է տվել շնորհակալություն հայտնել ԱՄՆ-ին աջակցության համար։ Առանց ԱՄՆ-ի, Վենսի կարծիքով, Ուկրաինան այլևս գոյություն չէր ունենա:

«Նախագահ Զելենսկին և նրա երկիրը կդադարեր գոյություն ունենալ՝ առանց Միացյալ Նահանգների առատաձեռնության։ Նա պետք է շնորհակալ լինի: Եթե համաձայն չես նախագահի հետ, վերցրու հեռախոսը և զանգիր նրան կամ մեր դիվանագետներին, այլ ոչ թե շրջագայիր Եվրոպայով մեկ՝ քննադատելով ԱՄՆ նախագահին: Դա վիրավորական է ինչպես նրա համար, այնպես էլ, ինձ և ամերիկացի ժողովրդի համար: Եվ, ի դեպ, դա հիմարություն է»,- լրագրողներին ասել է ԱՄՆ փոխնախագահը։

Այս շաբաթ Զելենսկին քննադատել էր ԱՄՆ նախագահին Պուտինի հետ բանակցությունների համար։ Ի պատասխան՝ Թրամփն Ուկրաինայի նախագահին «բռնապետ» էր անվանել՝ հիշեցնելով Ուկրաինային աջակցելու համար ԱՄՆ-ի ծախսած գումարները վերադարձնելու անհրաժեշտության մասին։