«Եվրոմիությունն Ուկրաինայից բնական ռեսուրսներ չի պահանջի»․ Կոշտա

Որպես փոխհատուցում տրամադրված օգնության դիմաց՝ Եվրոմիությունն Ուկրաինայից բնական ռեսուրսներ չի պահանջի, հայտարարել է Եվրոպական խորհրդի նախագահ Անտոնիու Կոշտան։
«Վերջին երեք տարիների ընթացքում Ուկրաինային աջակցելու հարցում Եվրոմիությունը հիմնական դոնորն է եղել։ Մենք դա անում ենք Ուկրաինայի, ուկրաինացիների, ինչպես նաև եվրոպական անվտանգության համար, և փոխարենն Ուկրաինայի բնական ռեսուրսներից ոչինչ չենք վերցնում»,- Կոշտայի խոսքերն է մեջբերում ուկրաինական հեռուստաալիքներից մեկը։
Ինչ վերաբերում է հազվագյուտ հողային մետաղների վերաբերյալ Ուկրաինայի և Ամերիկայի Միացյալ Նահանգների համաձայնագրին, Կոշտան հավելել է, որ Ուկրաինան ինքնիշխան երկիր է և «ինքնիշխան իրավունք ունի կառավարելու իր տարածքը և բանակցելու միջազգային մակարդակով»։

Հիշեցնենք, որ ԱՄՆ-ն հայտարարել էր, որ Վաշինգթոնը Կիևից ակնկալում է հազվագյուտ հողային մետաղների մատակարարման երաշխիքներ՝ ֆինանսական և ռազմական օգնության դիմաց։