«Միասնական դիրքորոշումներ կձևավորենք Եվրոպայում և կներկայացնենք ԱՄՆ մեր գործընկերներին»․ Զելենսկի

Ուկրաինայի նախագահ Վլադիմիր Զելենսկին երեկ երեկոյան տեսաուղերձում հայտնել է, որ մոտ ապագայում Եվրոպայում կձևակերպվեն ուկրաինական հակամարտության շուրջ ընդհանուր դիրքորոշումներ։

«Այս դիրքորոշումները կներկայացվեն Միացյալ Նահանգների մեր գործընկերներին։ Հուսալիությունը, խաղաղության տևականությունն ու պատերազմի ավարտի շուրջ պատշաճ համաձայնությունն իսկապես մեր ընդհանուր առաջնահերթությունն են»,- ասել է Զելենսկին։

«Բոլորը համախմբված են գլխավոր հարցում՝ որպեսզի խաղաղությունն իրական լինի, մեզ անհրաժեշտ են անվտանգության իրական երաշխիքներ»,- հավելել է նա: