«Պատրաստ եմ կրկին հանդիպել Թրամփի հետ»․ Զելենսկի

Ուկրաինայի նախագահ Վլադիմիր Զելենսկին հայտարարել է, որ պատրաստ է հանդիպել ԱՄՆ նախագահ Դոնալդ Թրամփի հետ, եթե վերջինս կրկին հրավիրի նրան «իրական խնդիրները լուծելու համար», փոխանցում է Bloomberg-ը։

«Մենք արժանի ենք հավասար երկխոսության… Եթե ԱՄՆ նախագահը հրավիրի մեզ կառուցողական երկխոսության, իրական խնդիրներ լուծելու, լուրջ հարցերի և իրական, վճռական գործողությունների ու պատասխանների համար, ես կգնամ»,- ասել է Զելենսկին։

Ուկրաինայի նախագահը նշել է, որ Սպիտակ տան հանդիպման բաց ձևաչափն արդյունավետ չէր ո՛չ ԱՄՆ-ի, ո՛չ էլ Ուկրաինայի համար։

«Ես համոզված եմ, որ այս իրավիճակը կանցնի. առջևում ավելի կարևոր բաներ են սպասվում»,- Reuters-ի փոխանցմամբ՝ նշել է Ուկրաինայի նախագահը։

Նա նաև հավելել է, որ Ուկրաինան պատրաստ է ստորագրել հանքային ռեսուրսների մասին համաձայնագիրը, որը չեղարկվել էր անցյալ շաբաթ Թրամփի և Զելենսկու բանավեճից հետո։