Ուկրաինան և ԱՄՆ-ն հաջորդ շաբաթ բանակցություններ կանցկացնեն Սաուդյան Արաբիայում

Ամերիկյան և ուկրաինական պատվիրակությունները բանակցություններ կանցկացնեն Սաուդյան Արաբիայում, հայտնել է Fox News-ը։

Հանդիպմանը ԱՄՆ-ն կներկայացնեն պետքարտուղար Մարկո Ռուբիոն, ԱՄՆ ազգային անվտանգության հարցերով խորհրդական Մայք Ուոլցը և Մերձավոր Արևելքի հարցերով բանագնաց Սթիվ Ուիթկոֆը։ Ուկրաինայից բանակցություններին կմասնակցի Ուկրաինայի նախագահի աշխատակազմի ղեկավար Անդրեյ Երմակը։

«Ռուբիոն, Ուիթկոֆը և Ուոլլցը երեքշաբթի կմեկնեն Էր Ռիադ՝ հանդիպելու ուկրաինացիների, մասնավորապես, նախագահի աշխատակազմի ղեկավար՝ Երմակի հետ»,- մանրամասնել է լրատվամիջոցը։

Ուկրաինայի նախագահ Վլադիմիր Զելենսկին X-ում հաստատել է, որ ուկրաինական և ամերիկյան թիմերը վերսկսել են աշխատանքը և հայտարարել հաջորդ շաբաթ «բովանդակալից հանդիպման» մասին։

Ավելի վաղ Մերձավոր Արևելքի հարցերով բանագնաց Սթիվ Ուիթկոֆը հայտնել էր, որ Էր Ռիադում ԱՄՆ-ն և Ուկրաինան կքննարկեն վեցամսյա զինադադար հաստատելու հարցը։

Հիշեցնենք, որ Փետրվարի 18-ին Էր-Ռիադում տեղի են ունեցել Ռուսաստանի և ԱՄՆ-ի միջև՝ երկար ժամանակից ի վեր առաջին բարձր մակարդակի բանակցությունները։