«Ռուսաստանն ու ԱՄՆ-ն դեռ չեն էլ սկսել աշխատել հարաբերությունների ուղղությամբ»․ Լավրով

ՌԴ արտգործնախարար Սերգեյ Լավրովը հայտարարել է, որ դեռ վաղ է գնահատականներ տալ և «հեռահար հետևություններ» անել՝ Մոսկվայի և Վաշինգթոնի միջև շփումների վրա հիմնվելով։ Նրա խոսքով՝ ռուս-ամերիկյան հարաբերություններում հակասություններն ու խնդիրները հաղթահարելու աշխատանքները «մեծ հաշվով նույնիսկ չեն էլ սկսվել»։

ՌԴ արտգործնախարարը նշել է, որ ամերիկյան նոր վարչակազմը «քայլեր է անում ճիշտ ուղղությամբ», սակայն չարժե առաջ ընկնել։

«Մենք գնահատում ենք դրանք, բայց, կրկնում եմ, այդ հիմքի վրա որևէ խորքային եզրակացություն անելը վաղաժամ է»,- հավելել է Լավրովը։

Լավրովը հստակեցրել է, որ Ռուսաստանի համար ամենակարևորն իր ազգային շահերի ապահովումն է և Ուկրաինայում հակամարտության բուն պատճառների վերացումը։